O vindeiro 7 de marzo, o pavillón deportivo do Milladoiro converterase no epicentro da innovación co regreso de InnovAmes 2025. Esta cuarta edición, organizada polo Concello de Ames en colaboración con empresas e centros educativos, busca impulsar a innovación, fomentar o emprendemento e crear sinerxías entre os diferentes axentes do ecosistema empresarial local.
A presentación no noso espazo…
O pasado venres tivo lugar a presentación oficial do evento en Espazo A Proa no Milladoiro. Durante o acto, destacouse o crecemento e consolidación do InnovAmes como un encontro de referencia para empresas innovadoras e proxectos educativos da comarca. Contouse coa presenza de representantes institucionais, así como de organizadores e colaboradores, que subliñaron a importancia da innovación como motor de desenvolvemento económico e social.
Un programa completo para a innovación
Ao longo de toda a xornada, InnovAmes ofrecerá un amplo programa de actividades orientadas a empresarios, profesionais, estudantes e cidadáns interesados na innovación. Entre as propostas destacan:
- Charlas e mesas de debate con expertos en tecnoloxía, sostibilidade e emprendemento.
- Obradoiros prácticos sobre novos modelos de negocio e tendencias do sector.
- Exposición de empresas innovadoras, onde se darán a coñecer proxectos disruptivos do tecido empresarial amesán.
- Entrega dos Premios InnovAmes, que recoñecen o talento e a innovación en empresas e proxectos educativos.
Participación destacada do Espazo A Proa
O noso espazo de coworking A Proa terá unha presenza activa no InnovAmes, con representación de varios dos nosos coworkers. Profesionais de diferentes ámbitos compartirán as súas experiencias e coñecementos, contribuíndo a enriquecer o diálogo e a creación de novas oportunidades de colaboración.
Entre os participantes vinculados a A Proa destacan Laura Iglesias (Livvdans), Paz González e Marisa Dequidt (Avelaiñas), Marcos Estévez (Amonte), Fátima Juncal (Recursos Humanos) e José Diéguez (Mundo Conexión), que achegarán a súa visión sobre a innovación nos seus respectivos sectores.
Unha xornada aberta a toda a comunidade
InnovAmes é un evento pensado para toda a cidadanía, tanto para profesionais do sector como para estudantes e persoas interesadas en coñecer os avances e innovacións que están a transformar o panorama empresarial. Se queres descubrir as últimas tendencias en tecnoloxía, sustentabilidade e emprendemento, non perdas esta oportunidade única para conectar con expertos e empresas punteiras.
