O pasado venres, Espazo A Proa converteuse nun punto de encontro entre a innovación e as persoas reais, celebrando o evento “IA para humanos reais”, dentro da Startup Europe Week 2025 (SEW25). Esta iniciativa aposta por visibilizar o emprendemento local, e nós sumámonos poñendo o foco na intelixencia artificial… pero con mirada humana.
Un obradoiro práctico sobre IA.
Baixo o título “IA para humanos reais”, o obradoiro estivo guiado por @elcreadordenubes, uns dos talentos que desenvolve o seu proxecto “Gran Rural” no espazo, propuxo un enfoque fresco, crítico e moi aplicable sobre o uso da IA . Falamos do que realmente importa:
A intelixencia artificial non entende se non lle sabes falar, os prompts (as instrucións que lle damos á IA) son tan importantes como saber escribir, interpretar ou argumentar. E que a IA non é máxica, senón unha ferramenta que reflicte as nosas intencións, sesgos e límites humanos.
Con exemplos reais, reflexionamos tamén sobre o perigo de delegar o pensamento na máquina, e da importancia de manter o espírito crítico e creativo cando usamos tecnoloxía para expresarnos ou crear.
Comunidade, aprendizaxe e conexións
O máis valioso, ademáis do contido da formación, foron as persoas que participaron. Rimos, preguntamos, compartimos dúbidas e descubrimos que non é necesario ser experto para entender e usar a IA con sentido.
Confirmamos algo que xa intuíamos: a tecnoloxía pode ser unha ponte, pero a comunidade é a que constrúe o camiño.
Desde Espazo A Proa continuamos organizando eventos que unen innovación, emprendemento e benestar. Porque sabemos que as ferramentas mudan, pero o que permanece é a vontade de crear xuntas e xuntos un futuro máis consciente, conectado e sostible.
Se es unha persoa curiosa, creativa ou con ganas de aprender, este é o teu sitio.
