Durante anos medimos o éxito dun proxecto pola súa viabilidade económica e financeira. Se os números cadraban, o negocio funcionaba. Pero hoxe iso xa non é suficiente.
O emprendemento sostible implica algo máis: preguntarse que impacto social e ambiental está xerando a nosa actividade. Porque un proxecto pode ser rendible e, ao mesmo tempo, estar contribuíndo a aumentar desigualdades ou a degradar o entorno. E cada vez máis administracións, entidades financeiras e persoas consumidoras esixen responsabilidade.
Neste contexto, os Obxectivos de Desenvolvemento Sostible (ODS) da Axenda 2030 convértense nun marco clave. Os 17 ODS marcan metas globais para avanzar cara a un modelo económico máis xusto e respectuoso co planeta. E tamén interpelan ás pequenas empresas e ás persoas emprendedoras.
Cando un negocio crea emprego digno (ODS 8), promove a igualdade (ODS 5), aposta pola produción responsable (ODS 12) ou reduce a súa pegada ambiental (ODS 13), está a contribuír directamente á Axenda 2030.
Para iso é necesario medir. A medición do impacto social pode incluír cuestións como a calidade do emprego xerado, a contratación de provedores locais, a inclusión de colectivos vulnerables ou a implicación coa comunidade. No ámbito ambiental, a sustentabilidade empresarial pasa por analizar o consumo enerxético, a xestión de residuos, o uso de recursos e a cadea de subministración.
Non se trata de ser perfecto desde o inicio, senón de integrar indicadores de sustentabilidade no modelo de negocio e avanzar de maneira consciente. O que non se mide, non se pode mellorar.
O futuro do emprendemento é sostible e colaborativo. E ese camiño faise máis doado cando formas parte dun ecosistema que impulsa esta visión.
Se queres que o teu proxecto sexa viable economicamente e, ademais, xere impacto social e ambiental real, o espazo de coworking público A Proa é o lugar onde dar ese paso. Un entorno para traballar, compartir e construír modelos de negocio con sentido.
Infórmate sobre como acceder a un posto fixo en Espazo A Proa e forma parte da comunidade emprendedora.
